Ang payaso ay para lamang sa sirko at kailanman ay hindi nababagay sa pulitika. Mahigit dalawampu’t dalawa ang nagpasa ng kanilang certificate of candidacy (COC) sa pagkapangulo sa unang araw ng pagpasa ng COC. Dahilan upang umani ang mga ito ng sari-saring opinyon sa mga netizens sa social media at maging sa tanyag na pamahayagan. hanggang sa kasalukuyan ito ay patuloy pa ring binabatikos at pinag-uusapan dahil tila karamihan sa mga naghahangad na maging presidente ng bansa ay wala pang mga karanasan.

Tila isang "FUN RUN" lamang ang sinasalihan ng mga nagpasa ng COC sa pagkapangulo sapagkat minamaliit nila ang posisyong kanilang tatakbuhan o sadyang ganito lang talaga kabulok ang sistema ng ating pamahalaan. Bagamat pinayagan ang lahat na tumakbo ay kailangan pa rin nating baguhin ang ganitong sistema upang mapili ang talagang karapat-dapat sa posisyon dahil ang darating na halalan ay hindi isang katatawan lamang na kailangang ipagsabawalang bahala. Wala tayo sa isang komedya kung saan lahat ng bagay at sitwasyon ay maaari lamang tawanan, nasa reyalidad tayo at ang napapalapit na halalan ay isang seryosong bagay na kailanman ay hindi madadaan sa tawanan at biruan. Kaya naman seryosohin ang pagpasa ng COC.

Ang pangulo ang pinakamataas sa lahat ng posisyon sapagkat nasa kamay niya ang magiging kinabukasan ng ating bansa ngunit ngayon halos kung sino-sino na lamang ang naghahangad na maging president ng ating bansa. Mga baguhan lamang ngunit hinahangad na agad ang pinakamataas na posisyon. Sa larangan ng pulitika hindi naman pinagbabatayan ang karanasan ng taong tumatakbo ngunit sa kung ano ang kanyang magagawa para sa bansa. Katulad na lamang ng isang tricycle driver na nagpasa ng certificate of candidacy para sa pagkapangulo. Patunay lamang ito na lahat ay mayroong magagawa para makamit ang pagbabago na hinahangad ng bansa. Lahat tayo pwede nating hangadin na maging president ng bansa ngunit kakayanin nga ba natin ang ganitong posisyon? Sigurado ka ba sa sarili mo na magagawa mo ang tungkulin ng isang presidente?  Higit sa lahat sigurado ka ba sa posisyong tinatakbuhan mo? Ang posisyon ng presidente ng bansa ang pinag-uusapan, isang eleksyon kung saan kabilang ang bilyon-bilyong tao. Wala tayo sa eleksyon sa loob ng silid-aralan kaya naman kung magpapasa ka ng COC siguraduhin mong may magagawa ka at may pagbabago kang maihahatid sa mga mamayan ng ating bansa.

Sa isang pagsusulit hinding-hindi mawawala ang multiple choice pero sa darating na halalan napasobra ata ang pamimilian para sa posisyon ng pagkapresidente. Habang patagal ng patagal ang filing ng certificate of candidacy, parami din ng parami ang mga taong nagpapasa ng COC sa pagkapresidente. Walang masamang maghangad na maging president ng bansa lalo na kung alam mo naman sa sarili mo na may magagawa ka para sa bansang iyong sinilangan at lahat ng nagpapasa ay dadaan pa rin sa proseso bago sabihing ganap na siyang kandidato sa pagkapresidente. Ngunit ang dating dalawampu’t dalawang nagpasa ngayon ay nasa 130 na, mukhang hindi na sinersyoso ng mga tao ang pagpasa ng COC para sa pinakamataas na posisyon sa bansa. Nasa demokratiko tayong bansa at nangangahulugan itong malaya tayo sa kung ano man ang ating gagawin at isa na rito ang malayang pagpasa ng COC sa kung anong posisyon ang ating hinahangad. Malaya nga tayo ngunit ang malayang pagpasang ito ay mukhang pinagsasawalang bahala na lamang ng iba at hindi sineseryoso. Ginagawa nilang laro na lang ang pagpasa ng certificate of candidacy. Nagmumukha tuloy mga payaso ang ibang nagpasa, mga payasong ginagawang sirko ang pagpasa ng COC. Sa 130 na nagpasa ang ilan lamang sa ito ay may totoong adhikain para sa bansa at ilan naman ay nakikigulo lamang at nakikiagaw-eksena sa mga seryosong tatakbo.

Ang payaso ay para lamang sa pagpapatawa pero ang isang pangulo ay para sa mamamayan ng isang bansa kaya naman payaso at pangulo kailanman ay hindi maaaring magsama. Papalapit na halalan ay seryosohin sapagkat kinabukasan ng bawat lahat at maging ng bansa ay dito nakasalalay. Bawat galaw ay pag-isipan at huwag laging idaan sa biruan. Baguhin ang sistema ng pamahalaan sapagkat ngayon tila mas nahihirapan pa ang mga mag-aaral na walang ID na makapasok sa paaralan kumpara sa mga taong tatakbong pangulo ng ating bansa.